పాలకూర, తోటకూర, గోంగూర, కరివేపాకు, మెంతికూర, కొత్తిమీర, పుదీన, బచ్చలి
ఆకుకూర పంటలలో లేత ఆకులను ఎప్పటికప్పుడు మొక్కల నుండి త్రుంచుతూ ఆకుకూరగా ఉపయోగిస్తాం. కరివేపాకు, కొత్తిమీర మరియు పుదీనాలను పచ్చళ్ళలో సువాసనకై వాడతాము. ఆకుకూరలలో చాలా పోషక విలువలు ఉండటం వలన ఇవి ఆరోగ్యానికి ఎంతో మంచిది. మెంతికూర మరియు గింజలలో ”ఔషధ గుణాలు” చాలా ఎక్కువ. కొత్తిమీర ఆకులు మరియు కాండమును సలాడ్లలో కూడా విరివిగా వాడతారు. ఆకుకూరలలో విటమిన్లు కూడా ఎక్కువగా ఉంటాయి. ఈ కారణాల రీత్యా సస్యరక్షణ కోసం రసాయన క్రిమినాశకాలను వాడకూడదు. సేంద్రియ పద్ధతులలోనే సస్యరక్షణ చేయాలి.
కీటకాలు:
రసంపీల్చే పురుగులు :
పేనుబంక, తామరపురుగు, దీపపు పురుగులు, పిండినల్లి, సిల్లిడ్నల్లి మొదలైనవి. రసంపీల్చే పురుగులు ఆకులనుండి మరియు లేత కాండం నుండి రసంను పీల్చుట వలన ఆకులు ముడుచుకు పోయి పసుపు రంగుకు మారతాయి. ఆకులు నాణ్యతను కోల్పోతాయి. ఒక్కోసారి ఆకులపై నల్లటి మసి కూడా ఏర్పడుతుంది.
నివారణ:
తప్పనిసరి పరిస్థితులలో వేప సంబంధిత మందులు (వేప కషాయం, నీమాస్త్రం, వేపనూనె మొ||) మాత్రమే పంట కాలంలో 1-2 సార్లు 10 రోజుల వ్యవధిలో పంటపై పిచికారీ చేసుకోవాలి. పిచికారీ చేసిన తరువాత 3-4 రోజుల వ్యవధిలో ఆకులను కోసుకోవచ్చు. కోసిన ఆకులను మంచి నీటిలో బాగా శుభ్రం చేసి వాడుకోవాలి.
ఆకులు తినే గొంగళి పురుగులు:
గొంగళి పురుగులు ఆకులను లేత కొమ్మలను తినడం వలన ఆకులకు రంధ్రాలు ఏర్పడి నష్టాన్ని కలుగజేస్తాయి. ఆకులు నాణ్యతను కోల్పోతాయి.
నివారణ:
గొంగళి పురుగులను చేతితో ఏరివేసి నాశనం చేయడం చాలా మంచిది. పైన సూచించిన వేప సంబంధిత సస్యరక్షణ మందులను మాత్రమే వాడాలి.
తెగుళ్ళు:
ఆకుకూర పంటలను ఆకుమచ్చ తెగులు, బూడిద తెగులు, కుళ్ళు తెగులు ఆశించి పంటకు నష్టం కలిగిస్తాయి.
నివారణ:
- తెగులు సమస్య ఎక్కువగా ఉన్న భూములలో పంట మార్పిడి పద్ధతిని పాటించాలి.
- బీజామృతం, బీజరక్షతో విత్తనశుద్ధి తప్పనిసరిగా శుద్ధి చేసుకోవాలి.
- 2 కిలోల ట్రైకోడర్మా విరిడీ, మాగిన పశువుల ఎరువు 90 కిలోలు మరియు 10 కిలోల వేప పిండి కలిపి నీళ్లు జల్లి వారం రోజులు మగ్గిన తరువాత ఆఖరి దుక్కిలో వేసి కలియ దున్నాలి. ఇలా చేయడం వలన నేల ద్వారా ఆశించే తెగుళ్ళను అరికట్టవచ్చు.
- పుల్ల మజ్జిగ + ఇంగువ ద్రావణం (ఒక ఎకరానికి 6 లీటర్ల పుల్లటి మజ్జిగ + 100 గ్రాముల ఇంగువ + 100 లీటర్ల నీరు) 10 రోజుల వ్యవధిలో 2-3 సార్లు పంటపై పిచికారీ చేయడం వలన ఆకుమచ్చ తెగులు మరియు బూడిద తెగులు నివారించబడుతుంది.
- జీవామృతాన్ని 15 రోజుకు ఒకసారి పంటపై పిచికారీ చేయడం వలన నాణ్యమైన ఉత్పత్తులను సాధించవచ్చు. జీవామృతం పంటలలో వ్యాధి నిరోధక శక్తిని పెంపొందిస్తుంది.
నారుకుళ్ళు తెగులు:
- నారు మడిలో లేత మొక్కలు గుంపులుగుంపులుగా చనిపోతాయి.
నారుకుళ్ళు నివారణ:
- విత్తనాలను విత్తన శుద్ధి చేసి ఎత్తైన నారుమడులలో నారును పెంచాలి. నారు మొలకెత్తిన తరువాత కాపర్ ఆక్సిక్లోరైడ్ 3 గ్రాములు లీటరు నీటికి కలిపి నారుమడి తడిసేలా పిచికారీ చేయాలి.
- బాక్టీరియా ఆకుమచ్చ తెగులు మరియు కోనఫోరా కొమ్మకుళ్ళు తెగులు :
- వాతావరణం మబ్బుగా ఉండి ఎక్కువగా వర్షాలు పడినప్పుడు ఈ తెగులు పంటను ఆశిస్తుంది. ఆకులమీద గోధుమ రంగు మచ్చలు ఏర్పడి, పండుబారి ఆకులు రాలిపోతాయి.
- కొనఫోరా కొమ్మకుళ్ళు తెగులు ఆశించిన మొక్కల లేత చిగుళ్ళు మాడిపోతాయి. కణుపుల వద్ద కుళ్ళు ఏర్పడి కొమ్మలు విరిగిపోతాయి.
నివారణ:
- కాపర్ ఆక్సిక్లోరైడ్ 3 గ్రాములు మరియు 1 గ్రాము స్ట్రెప్టో సైక్లిన్ ఒక లీటరు నీటికి కలిపి పిచికారీ చేయాలి.
- కొమ్మ ఎండు మరియు కాయకుళ్ళు తెగులు:
- కొమ్మలపై గోధుమ రంగు మచ్చలు ఏర్పడి క్రమేణా కొమ్మలు ఎండిపోతాయి. కాయల మీద నల్లటి మచ్చలు ఏర్పడి కాయలు కుళ్ళిపోతాయి.
నివారణ:
- కాపర్ ఆక్సీ క్లోరైడ్ 3 గ్రాములు లీటరు నీటికి కలిపి 10 రోజుల వ్యవధిలో 2 సార్లు పిచికారీ చేయాలి.
- పుల్ల మజ్జిగ + ఇంగువ ద్రావణాన్ని 10 రోజుల వ్యవధిలో 2 సార్లు పిచికారీ చేయాలి.
ఎండు తెగులు:
- మొక్కలు వడలిపోయి, పూత, పిందె, ఆకులు రాలిపోతాయి.
నివారణ:
- ట్రైకోడర్మావిరిడి 4 గ్రాములు కిలో విత్తనానికి పట్టించి విత్తుకోవాలి.
- ప్రధాన పొలంలో 2 కిలోల ట్రైకోడర్మావిరిడి 25 కిలోల పశువుల ఎరువుతో కలిపి ఆఖరి దుక్కిలో కలిపి కలియ దున్నాలి.
బూడిద తెగులు:
- ఆకులపై తెల్లటి బూడిద రంగులో మచ్చలు ఏర్పడతాయి. ఆకులు పండుబారి రాలిపోతాయి.
నివారణ:
- నీటిలో కరిగే గంధకం 3 గ్రాములు లీటరు నీటికి కలిపి 10 రోజుల వ్యవధిలో 2 సార్లు పిచికారీ చేయాలి.
- పుల్ల మజ్జిగ + ఇంగువ ద్రావణాన్ని 10 రోజుల వ్యవధిలో 2 సార్లు పిచికారీ చేయాలి.
వైరస్ తెగులు:
- మొక్కలు గిడసబారి పోతాయి. ఆకులు చిన్నవిగా మారి దుత్తులుగా ఏర్పడి ఎండిపోతాయి. పూత, పిందె ఏర్పడదు.
నివారణ:
- వైరస్ సోకిన మొక్కలను పీకి నాశనం చేయాలి.
- రసం పీల్చే పురుగులను నివారించాలి.
- విత్తనాలను ఆవుపాలతో విత్తన శుద్ధి చేసుకోవాలి.
వంగలో కాండము, కాయతొలుచు పురుగు
పురుగు ఆశించు కాలం: అన్ని సమయాల్లో రావచ్చు
నివారణ :
- ఈ పురుగు ఒక్క వంగ పంటమీదే జీవిస్తుంది. పంట మార్పిడి పాటించడం వలన అదుపులో ఉంటుంది.
- వాల్చిన తలలను, తొలచిన కాయలను ఎప్పటికప్పుడు ఏరి నాశనం చేయాలి.
- ఎకరానికి 50 చొప్పున లింగాకర్షక బుట్టలను అమర్చి పురుగు ఉధృతి పర్యవేక్షణ మాత్రమే కాకుండా మగ రెక్కల పురుగులను బందించి సమర్ధవంతంగా అదుపుచేయవచ్చు.
- 5% వేప కషాయం పిచికారి చేసి పొలంలో తల్లిపురుగు గుడ్లు పెట్టకుండా పారద్రోలవచ్చు.
జొన్నలో కాండం తొలుచు ఈగ
పురుగు ఆశించు కాలం: జూన్ – జులై
పురుగు ఆశించక ముందు తీసుకోవాల్సిన జాగ్రత్తలు
- తట్టుకునే రకాలైన సి.ఎస్.హెచ్ 17, ఎన్.టి.జె 4 రకాలను విత్తుకోవాలి.
- జూలై15 లోపు విత్తుకోవడం ద్వారా పురుగు తాకిడి నుంచి తప్పించుకోవచ్చు.
- ఆఖరి దుక్కిలో ఎకరానికి 200 కిలోల వేప పిండిని వేసుకోవాలి.
- పొలం గట్లపై కలుపు మొక్కలు లేకుండా ఏరి నాశనం చేయాలి.
నివారణ :
- ఎక్కువ విత్త్తనం నాటుకొని దెబ్బతిన్న మొక్కలను ఏరి నాశనం చేయాలి.
- తల్లి పురుగులు గుడ్లు పెట్టకుండా నివారించడానికి 5 శాతం వేప కషాయం పిచికారి చేయాలి.
- పురుగు ఉదృతి ఎక్కువగా ఉంటే అగ్నిహస్త్రం పిచికారి చేసుకోవాలి.
వేరుశనగలో ఆకుముడత
పురుగు ఆశించు కాలం: ఏ సమయాల్లోనైనా రావచ్చు
నివారణ :
- ఈ పురుగు ఒక్క వేరుశనగ పంటమీదే జీవిస్తుంది. పంట మార్పిడి పాటించడం వలన అదుపులో ఉంటుంది.
- పురుగు మందులు పిచికారి ఆపివేస్తే పరాన్న జీవుల వలన సహజ నియంత్రణ జరుగుతుంది.
- 5% వేప కషాయం పిచికారి చేయడం వల్ల తల్లి పురుగు గుడ్లు పెట్టడాన్ని నివారించవచ్చు.
- పంట వరుసలపై ఒక ముళ్ళ కంపను లాగుతూ వెళ్ళడం వలన పురుగు కట్టిన గూళ్లను విడదీసి అదుపుచేయవచ్చు.
- పొలాల్లో దీపపు ఎరలను ఉంచి తల్లి పురుగులను ఆకర్షించి అదుపు చేయవచ్చు.
వరిలో గొట్టాల పురుగు
పురుగు ఆశించు కాలం: మార్చి – నవంబర్
పురుగు ఆశించక ముందు తీసుకోవాల్సిన జాగ్రత్తలు
మొక్కలను సరియైన దూరంగా నాటాలి.
పురుగు గుడ్లను, ఫ్యూపాలను నాశనం చేయడానికి పంట కోత పూర్తి కాగానే భూమిని దున్నుకోవాలి.
8-20 కిలోల వేప పిండిని ఆఖరి దుక్కిలో వేసి కలియ దున్నుకోవాలి.
నివారణ:
పొలంలో వున్న లార్వాలను పంటపై త్రాడులాగి నివారించవచ్చు.
చామ, నిమ్మ ఆకులను ముక్కలుగా కత్తిరించి పొలంలో వెదజల్లితే అవి పురుగు వికర్షిణిగా పని చేస్తాయి.
3-4 రోజులు పొలంలో నిలిచి ఉన్న నీటిని బయటకి పంపించాలి. లేదా నిలిచివున్న నీటిలో తాజా ఆవుపేడ వేయాలి.